ആറ്റുകാൽപൊങ്കാല: വിശ്വാസവും ആചാരപ്പെരുമയും – പൊങ്കാല ഇടുന്നവർ ഉറപ്പായും പാലിക്കേണ്ട കാര്യങ്ങൾ

ലോകത്തിലെ തന്നെ ഏറ്റവും വലിയ സ്ത്രീ കൂട്ടായ്മയായി ഗിന്നസ് ബുക്കിൽ ഇടംപിടിച്ച ആറ്റുകാൽപൊങ്കാല കേവലം ഒരു വഴിപാടല്ല; അത് ഭക്തിയുടെയും സമർപ്പണത്തിന്റെയും പാരമ്യമാണ്. അനന്തപുരിയുടെ അധിപതിയായ ആറ്റുകാലമ്മയ്ക്ക് മൺകലത്തിൽ നൈവേദ്യം അർപ്പിക്കാൻ എത്തുന്ന ലക്ഷക്കണക്കിന് ഭക്തർ പാലിക്കേണ്ട പ്രധാന ചിട്ടകളും ഇതിന് പിന്നിലെ ഐതിഹ്യങ്ങളും നമുക്ക് പരിശോധിക്കാം.

1. വ്രതശുദ്ധി: മനസ്സിന്റെയും ശരീരത്തിന്റെയും ഒരുക്കം

പൊങ്കാലയ്ക്ക് മുൻപായി കർശനമായ വ്രതാനുഷ്ഠാനം നിർബന്ധമാണ്. വ്രതം കേവലം ഭക്ഷണനിയന്ത്രണമല്ല, മറിച്ച് മനസ്സിനെ ദേവിയിലേക്ക് കേന്ദ്രീകരിക്കലാണ്.

• കാലയളവ്: പൊങ്കാലയ്ക്ക് കുറഞ്ഞത് ഏഴു ദിവസമോ അല്ലെങ്കിൽ തലേദിവസമോ എങ്കിലും വ്രതം അനുഷ്ഠിക്കണം.
• നിയന്ത്രണങ്ങൾ: മത്സ്യമാംസാദികൾ പൂർണ്ണമായും ഉപേക്ഷിക്കണം. മദ്യപാനം, പുകവലി തുടങ്ങിയ ശീലങ്ങളിൽ നിന്ന് വിട്ടുനിൽക്കുക. ശാരീരിക ബന്ധങ്ങൾ ഒഴിവാക്കി ബ്രഹ്മചര്യം പാലിക്കണം.
• മന്ത്രജപം: വ്രതകാലത്ത് ‘ലളിതാ സഹസ്രനാമം’, ‘ദേവീ മാഹാത്മ്യം’ തുടങ്ങിയവ പാരായണം ചെയ്യുന്നത് ഉത്തമമാണ്.

2. അറിഞ്ഞിരിക്കേണ്ട ശുദ്ധാശുദ്ധികൾ

ക്ഷേത്രാചാരങ്ങൾ അനുസരിച്ച് ചില പ്രത്യേക സാഹചര്യങ്ങളിൽ പൊങ്കാല ഇടുന്നതിൽ നിയന്ത്രണങ്ങളുണ്ട്:

• മാസമുറ: മാസമുറ കഴിഞ്ഞ് ഏഴാം ദിവസം മുതൽ മാത്രമേ പൊങ്കാല സമർപ്പിക്കാവൂ.
• പുലയും വാലായ്മയും: കുടുംബത്തിൽ മരണം സംഭവിച്ചാൽ 16 ദിവസം വരെയും (പുല), പ്രസവം നടന്നാൽ 11 ദിവസം വരെയും (വാലായ്മ) പൊങ്കാല പാടില്ല.
• പ്രസവാനന്തരം: പ്രസവിച്ച സ്ത്രീകൾക്ക് ആറുമാസം കഴിഞ്ഞോ അല്ലെങ്കിൽ കുഞ്ഞിന്റെ ചോറൂണ് കഴിഞ്ഞോ മാത്രമേ പൊങ്കാല ഇടാൻ അനുവാദമുള്ളൂ.

3. പൊങ്കാല ഒരുക്കങ്ങളും സാമഗ്രികളും

പൊങ്കാലയ്ക്ക് ഉപയോഗിക്കുന്ന വസ്തുക്കൾ എല്ലാം പുതിയതും ശുദ്ധിയുള്ളതുമായിരിക്കണം.

• മൺകലം: ഒരിക്കൽ ഉപയോഗിച്ച കലം വീണ്ടും ഉപയോഗിക്കരുത്. പുത്തൻ മൺകലം തന്നെ വേണം.
• കാപ്പുകെട്ടും ദർശനവും: പൊങ്കാലയ്ക്ക് മുൻപായി ക്ഷേത്രത്തിൽ പോയി ഭഗവതിയെ തൊഴുത് അനുഗ്രഹം വാങ്ങുന്നത് ഐശ്വര്യപ്രദമാണ്. പ്രത്യേകിച്ചും കാപ്പുകെട്ട് കഴിഞ്ഞ് അമ്മയെ കാണുന്നത് ആഗ്രഹസാഫല്യത്തിന് വഴിതെളിക്കും എന്നാണ് വിശ്വാസം.
• സ്ഥലം: ക്ഷേത്രപരിസരത്തോ, നഗരത്തിന്റെ വിവിധ ഭാഗങ്ങളിലോ, സ്വന്തം വീടിന്റെ ശുദ്ധിയുള്ള മുറ്റത്തോ പൊങ്കാല ഇടാവുന്നതാണ്.

4. അടുപ്പ് വെപ്പുംഅഗ്നിപകരലും

പൊങ്കാല ദിവസം രാവിലെ ക്ഷേത്രത്തിലെ പണ്ടാര അടുപ്പിൽ തീ പകരുന്നതോടെയാണ് ചടങ്ങുകൾ ആരംഭിക്കുന്നത്.

• അടുപ്പ്: മൂന്ന് കല്ലുകൾ വെച്ച് അടുപ്പ് തയ്യാറാക്കാം. ചിരട്ടയും വിറകും ഉപയോഗിച്ചാണ് തീ കത്തിക്കേണ്ടത്.
• ഏകാഗ്രത: അടുപ്പ് കത്തിക്കുമ്പോൾ മുതൽ നിവേദ്യം കഴിയുന്നത് വരെ ഭൗതിക ചിന്തകൾ ഒഴിവാക്കി ഭഗവതിയെ ധ്യാനിക്കുക.
• ജപിക്കേണ്ട മന്ത്രം:

“സർവ്വമംഗള മാംഗല്യേ ശിവേ സർവാർത്ഥ സാധികേ |

ശരണ്യേ ത്ര്യംബകേ ഗൗരീ നാരായണീ നമോസ്തുതേ ||”

ഈ മന്ത്രം തുടർച്ചയായി ജപിക്കുന്നത് ദേവീപ്രീതിക്ക് കാരണമാകും.

ശേഷം അടുത്ത പേജിൽ (Page 2)